Монгол Улсад авто спортын төрөл үүсч хөгжсөн 20 гаруй жилийн хугацаанд авто машины холын зайн болон бартаат замын тойргийн уралдаанууд амжилттай зохион байгуулагдаж ирснээс гадна дэлхий нийтээрээ даяарчлагдаж буй өнөө үед авто машин, мотоциклын төрөлжсөн аяллууд эрчимтэй хөгжиж байна.
Энэхүү аяллын нэг төрөл болох “Auto extrim” буюу эрсдэл бүхий адал явдалт аяллыг зохиох боломж манай оронд байгааг сурталчлан таниулах зорилгоор Монгол Улсынхаа хилийг цаг уурын хүнд нөхцөлд бүтэн тойрч, монгол хүний хатуужил тэсвэр тэвчээрийг мэдрүүлэх, залуучуудад цэрэг эх оронч хүмүүжил төлөвшүүлэх зорилгоор “Аялал жуучлалын үндэсний төв”, “Монголын авто машин, мотоциклын спортын холбоо”, “Хил хамгаалах ерөнхий газар”, “NTV” телевизээс зохион байгуулан анхны гараагаа Монгол Улсын баатар Дүгэрийн Гуулингийн нэрэмжит хилийн 0214 дүгээр ангиас эхэлжээ.
Уг аялал хоёр сар гаруй хугацаанд эх орныхоо хилийн дагуу орших түүхэн дурсгалт газруудаар аялж, хилчдийн алба үйл ажиллагааг сурталчлах, залуу хойч үедээ хил хамгаалалтын түүхэн онцлогийг таниулах, өвлүүлэн үлдээх зорилгыг агуулж байгаа гэнэ.
“Чингис хааны говь” авто спортын клубыг үүсгэн байгуулагч, авто спортын дэд мастер Д.Батзориг энэхүү аялалд ганцаараа явж хатуужил, эр зоригийн гайхамшгийг түмэн олондоо харуулахаар шийдсэн бөгөөд “NTV” телевизийн зураглаач Л.Отгончулуун сурвалжлахаар хамт явж байна.
Тэднийг хилийн 0214 дүгээр ангийн зөвлөлийн гишүүд хүлээн авч, хүндэтгэл үзүүлэн сумын музей, ангийнхаа дайчин алдрын танхим, урлагийн тоглолт сонирхуулж аян замдаа сайн явахын ерөөл дэвшүүлэн мөнгөн аягатай сүү, алд цэнхэр хадгийг өргөн барьж үдсэн байна. Уг аялал хоёр сар гаруйн дараа тус ангийн “Бургастай” шалган нэвтрүүлэх боомтод өндөрлөх ажээ.
Ш.Цоодол
Эх сурвалж: http://news.gogo.mn/r/100475
